女：「妳唔需要理我係邊個，我亦都唔想知你係邊個。
重要嘅，係我地而家喺埋一齊。」
男：「兩個失去咗身份同自由嘅人，可以相愛咩？」
女：「我覺得咁好好，我終於可以好單純咁…
剩係憑感覺去判斷自己係咪愛你。」
有一朝瞓醒，我寫低咗幾句好韓劇 FEEL 嘅對白，作為一個失業編劇，我仍然會容許自己有靈感就創作。
我設想呢對男女係被人困咗喺一間密室度，黑布蒙眼，開始咗一段黑暗中嘅對話。
寫寫吓有D心寒。
唔知點解，我覺得自己好似真係聽過呢段對話，
但係又諗唔起喺邊度同幾時…
好彩我一早習慣咗：記憶消失咗，就有佢﹗
正如你喺屋企唔見咗支筆，你都會喺裡面繼續生活，而唔會堅持要揾返支筆出嚟先食早餐。
喺戲院同一個女仔喁喁細語，係一件好浪漫嘅事，
因為黑暗會令人同人之間嘅界線，暫時減弱一D。
我曾為了在銀幕的微光下，觀看一個女子的側面，而時常約她看電影。
當然，那人不是周詠琪。
周詠琪是「打冷」的好伴侶。
但我們又好像一起看過許多場電影，口味接近吧﹗
她比較能接受一些慢節奏 / 沒笑位 / 睇完都唔知導演想講乜嘅作品。
其實她是一個有內涵的女人，可惜男人都係睇樣嘅。
「唔係所有男人都咁 Cheap 吓嘛~？」她曾經問。
「有D男人會睇內涵嘅，不過都係睇咗樣先再睇內涵。」
她沉默了一陣。
「咁你係邊種？」
「我係睇身材嗰種。」
那時正下着雨，她仿佛故意讓雨點沾濕了眼鏡。
「你係個唔敢承認自己感情嘅男人，因為每當你愛上一個人之後，
就會不知所措。」
我買票，買可樂，靜靜進場。坐到右手面靠走廊的邊位。
以她對我的了解，即使摸黑進來，應該都可以找到我。
『尋找隱世巨聲』是一部紀錄片，講述一個音樂天才過著平淡的一生，到老才發現原來自己在南非紅過 Bob Dylan。
由於實在太好看，我一度忘記了自己是正在等人的。
忽然，後排座位傳來一把微小的聲音。
「我現在的處境並不安全，有一班勢力強大的人正在追捕我，請原諒無法在這場合仔細解釋了。找你見面是為了求証幾件十分重要的事，我會問你一些問題，全部答YES或NO 就得。YES的話你摸一摸鼻哥，NO 的話你便撓起雙手吧。」
我摸一摸鼻，表示明白。
「我開始了：第一條問題，你曾經跟我說過，在 2004 年你入職電視台的第九個月，發生了一件很離奇的事，有一晚你獨自行到古裝街煲煙，後來返回 OFFICE，發現所有同事都在尋找你。」
她的語調很凝重，一點不像平日的她。
「因為時間距離你去煲煙那刻計起，已經過了兩天。這件事是真的嗎？」
我緩慢、清楚地，摸一摸鼻。
「你完全不明白發生過什麼事，在你的記憶中，你就像平日一樣：點煙、發呆、散步回來，只是憑空消失了兩天。是這嗎？」
我繼續摸鼻。
「當時你的家人是打算報警的，但被你上司的上司，節目部總經理勸阻了。那人的名字是：岑天海。對嗎？」
我換一換手再摸鼻。
「除了你之外，其他同期的編劇同事有失踪過嗎？」
我撓手。
「與你同期入職的編劇共有四人，分別是張紫喬、伍懷德、曾見鋒、陳雪。我有沒有說錯或數漏？」
她竟然知道這四個名字，到底她在追查什麼？
我忍耐着，再摸鼻。
「跟着的問題很重要，請你想清楚才回答。自入職後，你們五個人有沒有參加過任何政治集會或遊行活動呢？」
我怔住，很努力地回想當年的瑣事、片段。但只能肯定自己沒有，其他人不確定。
「如果不確定的話，靜止別動。」
黑暗中，我靜止良久。
頭髮尾忽爾傳來幽幽的聲音。
「最後一條問題…」
她微弱而清晰地問：
「你有沒有愛過我？」
螢幕上孤高落泊的音樂人正踏過皚皚白雪，
一首名字叫『I Think of you』的歌柔柔響起。
我全身僵硬，動也不敢動。
應立即撓起雙手吧，但不知何解，無法完成這動作。
再按捺不住，轉身站起：「夠喇~﹗咪玩啦~~﹗」
背後的座椅已空掉。
周詠琪已離開了。
不負責任地，留下一千個問號，和全戲院怒睥着我的觀眾。
沒有留言:
張貼留言