「俾你睇埋呢條片吖~ 佢識得吹口水波呀﹗」
喺CAFÉ坐低之後嘅二十分鐘，張紫喬已經迫我睇咗十幾條片，全部都係佢個女嘅生活片段。
佢個女好似佢，一D都唔靚，有 D 童年史力加FEEL。
「好可愛~﹗好醒目呀~﹗」都只能夠咁反應。
張紫喬繼續沉醉喺個女嘅無聊舉動之中，好明顯佢而家居住嘅星球，係圍繞個女而運行。
我諗辦法入正題。
「最近有冇見過阿雪同曾見鋒呀？」
她呆一呆。反問：「我同你幾耐冇見？」
我想了想：「兩、三年度啦…」
「你肯定記錯。對上我地見面已經係 08 年嘅聖誕，就係阿雪結婚嗰晚。」
五年了，時間像倒水般流逝。
「所以，你呢份人係唔會咁好死無端端揾我嘅，究竟乜嘢事？」
張紫喬雖然已徹底師奶化，又上BB Kingdom，又報讀「子女名校面試必勝術」，不過年青時候嘅精明細心，仍未消失。
我不知從何說起，若果將怪老頭描述的『沉睡的人』計劃告訴她，正路應該會報警捉我入青山。
「係咁嘅… 我想知有冇一個姓周嘅女人揾過妳？」
「吓？冇喎~ 乜人嚟架？」
「佢係我朋友嚟。冇嘢架~ 不過佢係做 ICAC 嘅，最近查緊一單CASE…」
「點會關我事﹗？我好奉公守法架喎﹗」紫喬叫嚷着，帶點神經緊張。
我努力安撫她，並裝作若無其事地重提『電視城煲煙失蹤事件』。
「我記得呢件事…不過冇嘢好探究啦，你都好人好姐返返嚟咯。」她淡淡回應。
「我呢幾年記性差咗好多，其實當年除咗我，編劇組仲有冇人失踪過呀？」
她睜大眼望着我，似有些話想說又忍住了。
「點解問我？你應該問伍懷德啦﹗我地同期五個人最後得返你同佢繼續留喺電視台。」
我打斷她：「更正，我都冇做喇。」
紫喬露出難以置信的表情：「唔係吓嘛？」
「真架。」
「你唔做編劇，仲可以做乜？」
老友講嘢係直接 D 嘅。
「我覺得自己仲有好多可能性，不過今日嘅主題唔係傾呢樣嘢。」
「點解放棄？」她不放過我。
「我、阿雪、曾見鋒喺05年都 QUIT 咗，懷德升職，但係轉咗做行政。同期只係剩低你堅持創作落去…你係我地嘅夢想委託人。」
我發出苦澀又帶點變態的冷笑。
「多謝晒~﹗我做咗十年編劇，最偉大嘅創舉就係諗出咗大結局嚟一場BBQ，又方便揾景，又可以俾所有角色無厘頭一次過出晒場，仲有埋溫馨大團圓 ENDING﹗之後無數同事番兜呢條蹺，我每次喺電視睇到都好興奮，如果可以收版稅就發囉﹗」
她默然。
「其實我邊識創作吖，喺電視台做編劇亦都唔需要識。不斷翻炒幾條蹺，寫得好 D 嘅時候36點收視，寫得衰 D 就28點收視，不過都係垃圾，只係唔同味道、唔同包裝嘅垃圾。」
「你做得唔開心所以辭職？」
「唔係，唔開心咗好多年架嘞，慣咗呢個狀態返工冇影響嘅。」
「你唔好話俾我聽…想做D真正幫到人嘅事，跟住攞份保單出嚟呀﹗我已經供緊三份架喇~~」
「係懷德炒咗我﹗OK？」迫到我終於要講。
一陣長久的死寂。
我忽然記起，十年前某個趕稿的深夜，懷德偷偷買了深井燒鵝回來，我們五個到汽水機排着隊撳可樂，最後變成傾計傾通宵。
那時我的夢想是拍電影，紫喬說要五年內成為編審，陳雪只當編劇是跳板，真正的目標是寫小說。
曾見鋒：「夢想唔係攞嚟講嘅，所以我唔打算同你地分享。」
伍懷德：「我冇夢想喎，只要有樓有車有多D錢喺銀行就滿足架喇。」
「你係咪好嬲佢？」紫喬問。
「一D都冇，我直情覺得佢做得啱﹗根本我一早對生活已經冇晒想像力，仲點做創作吖~﹗做七仔可能仲有貢獻啦。」
「當年我都係因為呢個原因走。」
「唔？」
「冇晒想像力。諗嚟諗去劇情都一樣，寫嚟寫去結果都係寫返同一句對白，無論係古裝時裝警匪愛情都一樣…」
「妳咁做對得住自己良心咩﹗？」我即時反應。
「就係呢句﹗」
「我梗知，我寫得多過妳啦 ~ 依家返轉頭仲嚟得切架﹗」
「太遲喇，個腦已經俾人裝咗個框框。」
我心頭一震。
「妳話乜嘢話？乜嘢…框框？」
「有一個隱形嘅程式喺個腦裡面，自動化咗我思考嘅路徑。就好似喺一條外表好正常嘅街度行，周圍都係牆，每條路都好平坦好有秩序，但係當你喺高空府瞰落去就會睇到，原來自己一直喺個迷宮裡面…」
紫喬喃喃自語，帶着奇怪的清醒。
「妳係咪記返起 D 嘢？」
「當年喺電視城…我都有失蹤過。阿雪都有，佢曾經好驚咁同我講：
件內衣好似俾人除過出嚟，因為佢朝早瞓醒發現反轉咗。」
我口震震咁問：「仲有呢？」
「咪半夜喺三樓間房恰着，但係天光喺四樓張 SOFA 瞓醒囉﹗我都試過三次。」
「妳仲記得D乜呀？」
「係咁多喇。」
「吓﹗？」
「因為我刻意令自己忘記。」她輕鬆地說。
「發生過一D咁恐怖嘅事，妳點忘記倒呀？」
「就係恐怖先要忘記。離職之後我間唔中都有發惡夢，嚴重影響正常生活，你係我你會點吖？」
「去搞返清楚乜嘢事囉﹗」
「錯﹗咁做只會帶嚟更加多嘅煩惱，所以我揀咗另一個CHOICE：就係不斷叫自己忘記。」
「妳一定知道D嘢嘅﹗妳講俾我聽啦~」
「SORRY~! 我幫唔到你，因為…我真係忘記咗。」
紫喬突然用手指猛撳自己後腦，帶點神經質。
「原來人腦同電腦真係一樣架，可以將唔想要嘅 FILE 刪除﹗我地個腦入面都有嗰粒掣，只要你撳到就得架喇。」
我捉住佢對手，意圖制止佢內心嘅瘋狂。
「紫喬﹗妳幫吓我啦~ 我個朋友而家嘅處境好危險，我一定要搞清楚件事先可以救佢﹗」
「BEN，我而家生活得好好。你明唔明呀？雖然我同老公要供樓、交稅又乜义福利都冇，不過我都覺得好幸福，因為我個女有機會入直資小學。全靠神嘅指引，令我地一家都得救。」
我莫名其妙：「妳信咗教？」
「係。由我知道教友子女申請入學會易 D 之後，我就信咗。」
我覺得紫喬真係有 D 失常，定係我太 OUT？認識太少香港中產？
沒有留言:
張貼留言