不上班的人要 KEEP FIT,否則好容易山泥傾瀉,
我指身形。所以我迫自己每晚跑步。
故意揀食飯時間,因為公園嘅緩跑徑最少人,甚至冇人。
但係今晚有人。
跑到第三圈嘅時候,眼尾睄倒有一個女人忽然坐咗喺燈柱下面張長櫈,腿長,身材好。
我故意放慢速度想望多兩眼,又怕太刻意,唯有跑多圈再『目及』。
好彩﹗佢仲喺度。
點解知佢身材好?當一個女人着住鬆鬆嘅運動衫都仲睇到曲線,咁點都有返咁上下嘅。
斃~﹗佢好似發現我望佢,望返過嚟…
目光相接,我不自禁停步。
似曾相識的感覺,月色欲蓋彌彰,無法抑止的悸動漸漸蔓延全身。
美人,豪無疑問。而我並非因此而憾動着。
我認識她。
也許…可能…是上一世吧。
我們約定了要重逢,所以她今晚故意在我家樓下等我。
不然為何一個穿 PRADA 波鞋,手上戴着一隻價值十萬的 Cartier 手錶的女人,會夜晚七時許出現在緩跑徑?又唔係跑步?
她這身氣質與行頭,只應出現在半山豪宅會所。
而這裡是筲箕灣。
她靜靜望着我,彷彿等着我走向她。
猶豫之際,突然一左一右,兩個男人已把我挾在中間。
「你好﹗朋友~ 可唔可以同你傾吓計?」
原來是傳教的傢伙,白恤衫西褲、黑色名牌插在胸前。
我也看不清是末世聖徒還是摩門教了,總之好煩。
「唔好意思,我跑緊步。唔傾嘞 ~」
左邊男:「但係你停低咗。」
右邊男:「即係你都想休息吓。」
「係,不過我唔覺得同陌生人傾計係休息。唔該晒 ~」
佢兩個竟然仲唔走。
左邊男:「我地唔係陌生人。」
右邊男:「我地係你嘅弟兄。」
左邊男:「不如你睇清楚個牌先。」
他把名牌除下湊近我的眼前。我見到上面刻着:
『QUIT』
我呆了:「你地係…」
「不上班族。」
「歡迎你加入﹗」
圖書館怪老頭個樣浮現,有點腦衝血感覺。
「我冇加入﹗亦唔會加入﹗」我大吼。
二人錯愕,對望一眼。
左邊男:「唔係喎,組織嘅會訊話你係大長老推介入會,喺中央圖書館進行咗入會儀式架喎~﹗」
「佢係有俾過張 FORM 我填,不過我即刻揸埋一舊掉咗入垃圾桶嘞﹗」
二人鬆一口氣。
右邊男:「咁就啱喇。」
左邊男:「我地冇揾錯人。」
「我話我冇入會,掉咗張 FORM 入垃圾桶呀~~﹗」
右邊男:「我地不上班族嘅入會儀式…」
左邊男:「就係睇完張 FORM 將佢用力揸埋一舊,再掉落最就近嘅垃圾桶。」
右邊男:「恭喜你~~﹗弟兄。你揀啱咗﹗」
左邊男:「你將會得到新生命,一個每日都瞓到自然醒嘅世界等緊你。」
呢一刻,我發現美女唔知幾時已經消失咗﹗
一股失落化成莫名憤怒。
「你兩個再唔行開都會得到新生命。」
我推開兩條騎呢人,再喺公園兜咗個圏周圍揾下,
只係揾到飛蟻同蝸牛…
**************************************************
因為做人太累,放工唔想講嘢。
估唔到佢唯一俾人認同嘅德政,竟然係幫香港人爭取咗幾個國家嘅 WORKING VISA,等三十歲以下年青人可以選擇放下一切,到異地遊學短居。
從港人踴躍投入WORKING HOLIDAYS 呢個現象,証明咗三樣嘢:
1.
好多人唔滿意自己嘅生活,想出走。
2.
好多人唔想留喺香港。
3.
好多人唔想返工。
4.
曾蔭權應該做旅發局,唔應該做特首。
SORRY~! 打多咗個 POINT…
「如果一個人去完澳洲摘士多啤梨,回來繼續上班儲錢供樓。即是那段日子毫無反省,只是去了一趟長旅行。」
圖書館怪老頭說。
「WORKING HOLIDAYS 並不能改變你的人生,若你最後還是回到『系統』裏。」
「你指的『系統』是…?」
「社會奴化你的地方,小時候是『學校』,長大後變作『公司』。」
「你太極端了吧﹗雖然我對公司也沒好感,但也不覺得自己是奴隸。」
「這就是現代人最大的悲哀,古代的奴隸至少知道自己是奴隸。」
我沉默,無謂同佢爭辯。始終我條命喺佢手上,而家揸車嗰個係佢。
「你知道一個完成型的『沉睡的人』是怎樣的嗎?」
我搖頭。果然,他自顧自說下去。
「就是上班、下班、上班、OT、下班、上班、OT、下班……
跟着臨睡前自動接收『植入指令』:透過看電視。不斷重複同一樣的生活,對世界發生的任何事情都沒興趣,尤其是政治。」
我冷笑:「哈、哈哈~﹗ 不過我在你說的那個負責發放『指令』的電視台工作了十年,我肯定這些科幻情節不可能發生。」
「你讀大學的時候比現在關心政治吧?」
我想一想,好似又係咘。
「進了電視台之後,你連 YAHOO 新聞政治版也少看吧?」
越聽越不自在,一股莫名不安蠢蠢欲動。
「你不知道今天是什麼日子吧?」老頭忽然問。
「我當然知道,你當我白痴嗎?今天是六月四日嘛 ~」
他深深地吸一口氣,神色凝重地期盼我說下去。
「對﹗你記得?」
「記得什麼?」
「六月四日…」
「我知今天是六月四日,那又怎樣?你生日?」
他再沒講半句話,一路專心駕駛。
這副神態很熟稔,去年周詠琪好像也問過我同一個問題。
之後她也是萬分凝重,神情好像得知我生 CANCER 似的。
六月四日,到底發生過什麼事?
honest saying
回覆刪除你個3個原因充滿負面同逃避既感覺, 我相信有相當數量既人係帶住熱情, 希望同迎接去展開一個WORKING HOLIDAY既旅程。
出去見識多D,接觸下不同既文化,係當地吸引下自己有興趣既知識同經驗。增廣見聞後再實踐落日常生活,社交,工作,甚至同岩傾既人分享。經濟情況許可既話成件事其實可以好美好,有多方面既得益。
我相信2種人都有既~
THOMAS (我中文差唔太識用標點符號勿見怪><)
可否寫快點,很想看,因為我是不上班族,嘿嘿!
回覆刪除Thomas:多謝你的意見,仲有,你D中文都唔係咁差啫~
回覆刪除---流河
@n@: 盡量啦~!雖然我都係不上班族,不過平日仲要做FREELANCE。不過都多謝妳嘅支持:)
回覆刪除---流河